Jeremiah 32

1¶ Dispela tok i kam long Jeremaia long BIKPELA long namba ten yia bilong Sedekaia, king bilong Juda, dispela em i namba 18 yia bilong Nebukadresar. 2Long wanem, nau ami bilong king bilong Babilon i pasim Jerusalem. Na profet Jeremaia i pas insait long ples op bilong kalabus, dispela i stap long haus bilong king bilong Juda. 3Long wanem, Sedekaia, king bilong Juda, i bin pasim em, i spik, Olsem wanem na yu autim tok profet, na tok, BIKPELA i tok olsem, Lukim, Mi bai givim dispela biktaun long han bilong king bilong Babilon, na em bai kisim dispela. 4Na Sedekaia king bilong Juda bai i no inap ranawe long han bilong ol lain Kaldia, tasol tru tumas, Mi bai givim em long han bilong king bilong Babilon, na em bai toktok wantaim em maus i go long maus, na ol ai bilong en bai lukim ol ai bilong em. 5Na em bai karim Sedekaia long Babilon, na em bai stap long dispela hap inap long taim Mi kam lukim em, BIKPELA i tok. Maski yupela i pait wantaim ol lain Kaldia, yupela bai i no inap kamap gutpela. 6Na Jeremaia i tok, Tok bilong BIKPELA i kam long mi, i spik, 7Lukim, Hanamel, pikinini man bilong Salum, smolpapa bilong yu, bai kam long yu, i spik, Yu baim ples kunai bilong mi, dispela i stap long Anatot. Long wanem, rait bilong baim bek em i bilong yu bilong baim dispela. 8Olsem na Hanamel, pikinini man bilong smolpapa bilong mi i kam long mi long ples op bilong kalabus, bilong bihainim tok bilong BIKPELA, na tokim mi, Mi askim yu plis, baim ples kunai bilong mi, dispela i stap long Anatot, dispela i stap long hap bilong Benjamin. Long wanem, rait bilong kisim samting papa i givim pikinini em i bilong yu, na rait bilong baim bek dispela em i bilong yu. Baim dispela bilong yu yet. Nau mi save long dispela em i tok bilong BIKPELA. 9Na mi baim ples kunai bilong Hanamel, pikinini man bilong smolpapa bilong mi, dispela i stap long Anatot, na mi skelim dispela mani long em, yes, 17 sekel silva. 10Na mi raitim samting bilong truim, na putim mak long en, na kisim ol witnes, na skelim dispela mani long em long ol skel. 11Olsem na mi kisim samting bilong truim bilong mi baim graun, dispela samting ol i pasim pinis bilong bihainim lo na kastam, na dispela samting i op wantaim. 12Na mi givim samting bilong truim bilong mi baim graun long Baruk, pikinini man bilong Neraia, pikinini man bilong Masea, long ai bilong Hanamel, pikinini man bilong smolpapa bilong mi, na long pes bilong ol witnes husat i rait long buk i soim olsem mi baim graun, long ai bilong olgeta Ju husat i sindaun long ples op bilong kalabus. 13Na mi givim tok long Baruk long ai bilong ol, i spik, 14BIKPELA bilong ol ami, God bilong Isrel, i tok olsem, Kisim ol dispela samting bilong truim, dispela samting bilong truim bilong mi baim graun, dispela ol i pasim pinis na dispela samting bilong truim i op wantaim, na putim tupela insait long wanpela sospen graun, inap long ol i ken stap yet planti de. 15Long wanem, BIKPELA bilong ol ami, God bilong Isrel, i tok olsem, Ol man bai holimpas gen ol haus na ol ples kunai na ol gaden wain long dispela hap. 16¶ Nau taim mi bin givim samting bilong truim bilong mi baim graun long Baruk, pikinini man bilong Neraia, mi beten long BIKPELA, i spik, 17Ah GOD Bikpela! Lukim, Yu bin wokim heven na dispela graun long bikpela pawa bilong Yu na han bilong Yu i op, na i no gat wanpela samting i hat tumas long Yu. 18Yu soim pasin laikim tru na mekim gut long ol tausen manmeri, na bekim pe long sin nogut bilong ol papa i go long bros bilong ol pikinini bilong ol bihain long ol. Dispela Bikpela, Strongpela God, BIKPELA bilong ol ami, em i nem bilong Em, 19Bikpela long tok helpim, na strongpela long wok. Long wanem, ai bilong Yu i op long olgeta pasin bilong ol pikinini man bilong ol man, bilong givim olgeta wan wan samting bilong bihainim ol pasin bilong em, na bilong bihainim kaikai bilong olgeta wok bilong em, 20Husat i bin putim ol mak na ol samting i winim tingting long hap bilong Isip, yes, inap long tude, na long Isrel, na namel long ol arapela man. Na Yu bin mekim bilong Yu wanpela nem, olsem long tude. 21Na Yu bin bringim lain manmeri bilong Yu Isrel ausait long hap bilong Isip wantaim ol mak, na wantaim ol samting i winim tingting, na wantaim wanpela strongpela han, na wantaim wanpela han i op, na wantaim bikpela pret nogut tru. 22Na Yu bin givim dispela hap long ol, dispela Yu bin wokim strongpela promis long ol tumbuna papa bilong ol long givim ol, wanpela hap i ran wantaim susu na hani. 23Na ol i kam insait, na holimpas dispela. Tasol ol i no bihainim nek bilong Yu, o wokabaut long lo bilong Yu. Ol i no bin mekim wanpela samting long olgeta samting Yu tok strong long ol long mekim. Olsem na Yu bin mekim olgeta dispela samting nogut long kam antap long ol. 24Lukim ol liklik maunten bilong pait, ol i kam long biktaun bilong kisim dispela. Na Yu givim dispela biktaun i go long han bilong ol lain Kaldia, husat i pait birua long en, bilong tingim bainat, na bilong bikpela taim hangre, na bilong bikpela sik nogut. Na wanem samting Yu bin toktok long en i kamap pinis. Na, lukim, Yu lukim dispela. 25Na Yu bin tokim mi, O GOD Bikpela, Yu baim dispela ples kunai long mani, na kisim ol witnes. Long wanem, Mi givim dispela biktaun long han bilong ol lain Kaldia. 26¶ Nau tok bilong BIKPELA i kam long Jeremaia, i spik, 27Lukim, Mi stap BIKPELA, God bilong olgeta samting i gat bodi. Ating i gat wanpela samting i hat tumas long Mi? 28Olsem na BIKPELA i tok olsem, Lukim, Mi bai givim dispela biktaun i go long han bilong ol lain Kaldia, na i go long han bilong Nebukadresar, king bilong Babilon, na em bai kisim dispela. 29Na ol lain Kaldia, husat i pait birua long dispela biktaun, bai kam na kirapim paia long dispela biktaun, na kukim dispela wantaim ol haus, antap long ol rup bilong husat ol i bin ofaim insens i go long Beal, na kapsaitim ol ofa bilong dring i go long ol arapela god, bilong skrapim bel bilong Mi long belhat. 30Long wanem, ol pikinini bilong Isrel na ol pikinini bilong Juda i bin mekim pasin nogut tasol long ai bilong Mi, taim ol i stap yangpela i kam inap long nau. Long wanem, ol pikinini bilong Isrel i bin skrapim bel bilong Mi long belhat tasol wantaim wok bilong ol han bilong ol, BIKPELA i tok. 31Long wanem, dispela biktaun i bin stap long Mi olsem wanpela samting bilong skrapim belhat bilong Mi na belhat nogut tru bilong Mi, i stat long dispela de ol i wokim biktaun, yes, inap long tude. Inap long Mi mas rausim dispela long ai bilong pes bilong Mi, 32Bilong tingim olgeta pasin nogut bilong ol pikinini bilong Isrel na ol pikinini bilong Juda, dispela ol i bin mekim bilong skrapim bel bilong Mi long belhat, ol, ol king bilong ol, ol hetman bilong ol, ol pris bilong ol, na ol profet bilong ol, na ol man bilong Judah, na ol man i stap long Jerusalem. 33Na ol i bin tanim baksait bilong ol long Mi, na i no pes bilong ol. Maski Mi skulim ol, taim Mi kirap long moning tru na skulim ol, yet ol i no bin harim bilong kisim skul. 34Tasol ol i putim ol sting samting bilong ol insait long haus, dispela ol i kolim long nem bilong Mi, bilong mekim dispela i kamap doti. 35Na ol i wokim ol ples antap bilong Beal, dispela i stap long ples daun bilong pikinini man bilong Hinom, bilong mekim ol pikinini man bilong ol na ol pikinini meri bilong ol long go namel long paia i go long Molek. Dispela Mi no tok strong long ol long mekim, na tu em i no kam insait long tingting bilong Mi, inap long ol i ken mekim dispela sting pasin, bilong mekim Juda sin. 36Na olsem na nau BIKPELA, God bilong Isrel, i tok olsem long sait bilong dispela biktaun, we yupela tok long en, Ol bai givim dispela i go long han bilong king bilong Babilon long wok bilong bainat, na long bikpela taim hangre, na long bikpela sik nogut, 37Lukim, Mi bai bungim ol ausait long olgeta kantri we Mi bin ranim ol i go long belhat bilong Mi, na long belhat nogut tru bilong Mi, na long bikpela belhat tru. Na Mi bai bringim ol gen long dispela ples, na Mi bai mekim ol long stap gut. 38Na ol bai stap lain manmeri bilong Mi, na Mi bai stap God bilong ol. 39Na Mi bai givim ol wanpela bel, na wanpela pasin, inap long ol i ken pret long Mi oltaim oltaim, bilong ol i ken stap gut, na ol pikinini bilong ol bihain long ol. 40Na Mi bai wokim wanpela kontrak bilong oltaim oltaim wantaim ol, inap long Mi bai i no inap tanim na lusim ol, bilong mekim gut long ol. Tasol Mi bai putim pret bilong Mi insait long ol bel bilong ol, inap long ol bai i no inap lusim Mi. 41Yes, Mi bai wokim amamas tru antap long ol long mekim gut long ol, na tru tumas, Mi bai planim ol long dispela hap wantaim olgeta bel bilong Mi na wantaim olgeta tewel bilong Mi. 42Long wanem, BIKPELA i tok olsem, Wankain olsem Mi bin bringim olgeta dispela bikpela samting nogut antap long dispela lain manmeri, olsem tasol bai Mi bringim antap long ol olgeta dispela gutpela samting Mi bin promisim ol. 43Ol bai baim ol ples kunai long dispela hap, dispela we yupela tok long en, Em i stap nating na i no gat man o animal. God i givim dispela long han bilong ol lain Kaldia. 44Ol man bai baim ol ples kunai long mani, na raitim ol samting bilong truim bilong en, na putim mak long ol, na kisim ol witnes long hap bilong Benjamin, na insait long ol ples klostu long Jerusalem, na long ol biktaun bilong Juda, na long ol biktaun bilong ol maunten, na long ol biktaun bilong ples daun, na long ol biktaun bilong hap saut. Long wanem, Mi bai mekim kalabus bilong ol long kam bek, BIKPELA i tok.